بلد زبالة .. العفو

بدي إكتب بالعامية وما حدا إلو معي، ويلي ما عجبو “يروح يبلط البحر” (مستوحات)، يعني هيدي اللغة مفهومة أكتر للشعب اللبناني، مع سابق الإعتذار منه، بس هوه السبب بكل هل بلاء.

ببلدنا لبنان، كل الشعب بحاول وعم بحاول يوقف على الإشارة وينفذ أوامر شرطي السير، إلا -الزعران- الزعماء والسياسيين يلي هنه بالاساس كتبوا مواد القانون، والأحلا من هيك إذا حاولت تمشي بعكس موكب “الأزعر” بيصرخ فيك الأزعر الأصغر -حرسه- على جنب يا “حيوان” (يعني الزلمي ديمقراطي، قلك حيوان وتركلك حرية إختيار الحيوان المناسب، ليش إنتو هيك، فيكم تختارو نمر أو فهد، لأ بلا فهد، مكروه بالبلد هيدا الإسم).

ببلدنا لبنان، يعني إذا قررت الإنضمام إلى الجيش أو الدرك أو الجمارك أو الأمن العام (لسببين، يا أما حبّك للبنان لدرجة إنك تدفن حالك بالسلك، أو لأنو مسكرة معك من كل الجهات وقلت يلا يا ولد إتطوع بالدولة على القليلة معاشك واصلك قبل آخر الشهر، بس ما تنسى الواسطة !) ممكن بتطوعك هيدا، تترقى وتصير بعد 25 سنة خدمة مثلاً وزير .. وحتى ممكن تصير مثلاً رئيس جمهورية، بس لازم تكون ماروني، ونصيحة مني ما تفرح، لأن الرئيس كل يلي بيعملوا بيستقبل وبودع وبشدد وبندد وبيستنكر وبيسافر، أكتر من هيك ما بيقدر، بطحلّ .. (تعليق سابق كتبته على الفايسبوك منذ أيام: غداً في الـ 25 من ايار، ينهي رئيس الجمهورية ميشال سليمان النصف الاول من ولايته من دون أن يسجل التاريخ له اي قرار مصيري أو تحرك دولي أو أيا شي نقول عنو لولادنا إنو هيدا الرئيس عمل شي يعني .. على أمل النص التاني من ولايته يعمل شي تيحسن وضعو !! ينعاد عليك يا ريّس !!)

ببلدنا لبنان، إذا مشي حالك وصرت وزير، وقررت تكون شريف، فهيدا شي عار عليك، يعني شي مستحيل، وتأكد إنو في شي أزعر تحتك تابع لشي أزعر أكبر منو لح يرفض أوامرك حتى لو كنت رئيس للجمهورية، ما نحنا ببلد الدويلات والبدلات. (تفووووووووو)

ببلدنا لبنان، إذا مرقت قدام شي سيارة مفيّمة وزمرلك بالزمور المشهور أو حكاك على مكبر الصوت وقلك يا حيوان مرقني أو قرّب، ما تحاول تعمل عنتر لأنو يا إبن شي أزعر أو من الحاشية، وعلى فكرة مرّة كنت مارق على التباريس – بيروت، ودكتور حاول يقطع بسيارتو كسر عليه واحد معو “بي أم” ونزل بدو يضربو، بعد شوي مين بيطلع الشبّ ؟؟ صاحب بنتو للعميد .. يعني الصهر المرتقب .. (بلد توووووت).

ببلدنا لبنان، حفل العهر السياسي دائم، عرض متواصل دون فواصل، شلح قمصان بالساحات، تهديدات لبعض، الكل عملاء، ومش عارفين … بـ … مين !! يعني ضايعة الطاسة، بس المهم إنو السياحة ماشية، مع إنو البلد كلو على بعضه واقف على كم خليجي مستثمر بلبنان وكمّ … موجودين/ موجودات بالمعاملتين، الله وكيلكم هودي مصدرنا ونحنا كتير كووول وشفافين!
والحديث القائم بالبلد على المرجلة وهدّ الجبال، وعلى قولة المتل: جبل لجبل ما بيلتقو، بس إنسان لإنسان بيتواجهو .. وكلها كيديات وقلوب مليانة، والبلد على كف عفريت، والعفريت فالت بين زواريب الوزارات وبيوت الزعران ونحنا ناطرين نكزة، يعني !

(حوار صباحي اليوم أجري بيني وبين صديقي):
سليم: صباحو ..
نبيل: صباحو .. كيفك ؟
سليم: معك البدلة ؟؟
نبيل: بدلة شو؟
سليم: بدلة رقص .. ولك شو بدلة شو .. بدلة حرب !! بدنا نداهم شي وزارة هيك هيك سايبة
نبيل: هاها … قوية .. بلد عايش ع مخالفة النظام .. بس اي وزارة؟
سليم: يعني يلي فيها مصاري !! بتعرف شي وحدة فيها مصاري مش مسروقة ؟
نبيل: راحت علينا كل الوزارات مسروقة.
سليم: طيب شو العمل ؟
نبيل: نعمل صحن فتوش او تبولة ؟
سليم: هيدا الشاطرين فيه نحنا اللبنانية ! التبولة والحمصّ وكتاب غينيس
نبيل: هذا هو الألهاء عن مشاكلنا
سليم: طيب في حلّ ؟
نبيل: لا أظن
سليم: إلك مونة على شي كم أزعر ببدلاتهم ؟
نبيل: لأ أنا قادمي ..
سليم: طيب لكن، الرجاء من جميع الشرفاء توضيب أمتعتهم وشدّ الأحزمة لأننا سوف نقلع من هذه المزرعة .. البلد للزعران وبسّ.