مهام جديدة لقوى الأمن الداخلي

سمحولنا للمرّة التانية نكتب بالعاميّة، يمكن هيك الرسالة عم توصل أسرع، بالموضوع الماضي كتبنا عن الوضع بالبلد وكان عنوان التدوينة “بلد زبالة .. العفو” ونتقدنا رئيس الجمهورية يلي خلص أول نص من مدّة ولايتو بلا ايا قرار أو تصرف بيستحق الوقوف عندو، والريس حبيب الشعب والملايين ما كذب خبر وما زعلنا، وقرر يخوض معركة سياسية حتى النخاع، وقرر محاكمة اللواء ريفي (راجع مقال الأخبار)، بس هيدا الشي مش كافي، يعني مش إذا حاكمنا رأس الهرم على إهمالو وفسادو بيصلح السلك كلو، ويلي شفتو اليوم شي بيمجّد الخالق يعني.

الزمان: الثلاثاء 31 أيار 2011، في تمام الساعة 8:30 صباحاً.

المكان: مقابل مستشفى “أوتيل ديو”

الموضوع: غسيل سيارة المعلّم ..

عنصران من الأمن الداخلي “درك” مشمرين على إيديهم ونازلين فرك بالسيارة، وأكيد هيه مش لواحد من العنصرين لأنو السيارة بتضل هونيك وبيدل في حرس حوليها، يعني يا بيت يا مكتب شي عميد أو ضابط أو قاضي أو .. يعني شي واحد فاسد، للوهلة الأولى أنا فكرت إنو هيدي المهمة -غسل السيارة- من مهام العناصر المولجة بحمياة المعلّم، ولما جيت على مكتبي وراجعت موقع قوى الأمن، ما لقيت ضمن مهامهم غسيل السيارة !! يعني يمكن في شي عنصرين تانيين ببيت المعلّم عم يكوو القمصان والبدلات تبعولو، أو يمكن عم يجلو الجليات .. أو يمكن عم بيغيرو الحفاض لحفيدو !! ما حدا بيعرف ..

 بعض من مهام قوى الأمن الداخلي:

• حفظ النظام وتوطيد الامن.
• تأمين الراحة العامة.
• حماية الاشخاص والممتلكات.
• حماية الحريات في اطار القانون.
• السهر على تطبيق القوانين والانظمة المنوطة بها.
(للتفاصيل إضغط هنا)

يعني يا حضرة الرئيس ويا معالي الوزير المعتكف ويا معالي الوزير بالوكالة، بيطريقكم مدام بلشتو تحاكمو بعض (بغض النظر إذا من منطلق كيدية أو رجولة أو من منطلق وعي وطني بهل لحظة) شوفولنا شو وضع هيدا السلك ورجعو صيغو المهام، يعني كرمال البدلة يلي لابسها الدركي هيدا مش كرمال شي !!

معرض الصور:

الوجّ الأول

رشّة ميّ من صوبك معلم

من قدام كمان

ومن تحت شويّ