النائب سامي الجميل يلتحق بالمنتخب اللبناني

سامي الجميل ينفرد بالكرة بعد ان تخطى الكابتن ماجد والكابتن رابح والاخوين شوقي

النائب سامي الجميل في اتصال مع مدرب منتخب لبنان ثيو بوكير ..

سامي الجميل: انا فتى الكتائب جاهز لاشارك معكم بالماتش ضد كوريا

ثيو بوكير: وحضرتك بتلعب فوتبول ؟؟

سامي الجميل: ايه ما احضرتني بماتش النواب ؟

ثيو بوكير: لا والله ما احضرتك !!

سامي الجميل: ايه ايه انا جبت 3 غوال واصلاً انا على البلايستايشن دايماً بغلب امين

ثيو بوكير: مين امين ؟

سامي الجميل: البابا، ولو ما بتعرفو ؟ صرلو شي 6000 سنة حضارة .. قصدي 6000 سنة رئيس حزب الكتائب

ثيو بوكير: لا والله ما بتدخل بالسياسة، طيب شو بتلعب ؟

سامي الجميل: بلعب “فارم فيل” بالمجلس، وبلعب “سبع طوابق” مع نديم ويمنى وبلعب بيت بيوت مع صوصو ..

ثيو بوكير: لأ ما قصدي شو بتلعب بوقت فراغك، قصدي شو بتلعب بأيا موقع ؟ بعدين مين صوصو ؟

سامي الجميل: صوصو هيه صولونج مرة عمي، وبلعب بموقع الكتائب اذا خلصت حصد المزروعات يلي عندي بالـ “فارم فيل”.

ثيو بوكير: يا حبيب قلبي، يا عمو سامي، قصدي شو موقع بالملعب ؟؟

سامي الجميل: آه .. ايه مهاجم ..

ثيو بوكير: طيب عندك يوني فورك ؟؟

سامي الجميل: ايه عندي، ما تفكرني متل عمو ميشال فرعون بجي على الملعب بالصباط الرسمي .. معي تيابي كاملين .. شو بجي على التمارين ؟؟

ثيو بوكير: طيب تعا بعد بكرا الساعة 10 على التمارين ومنشوف وضعك.

سامي الجميل: ميرسي كوتش .. بجيب معي نديم ؟

ثيو بوكير: لا اتركو بالبيت عم يلعب بالبلايستايشن ..

—–

* سامي الجميل عبر فايسبوك: ثيو بوكير طلب مني الالتحاق بصفوف المنتخب اللبناني لمواجهة المنتخب الكوري، وسالتحق يوم الاربعاء بالتدريبات.

*ملاحظة: مباراة المنتخب اللبناني والمنتخب الكوري غداً الثلاثاء وليس الاربعاء، يعني سامي الجميل اكل الضرب .. معليش هيدا مصير يلي ما بتابع اخبار بلدو !!

* شاهدوا غداً مباراة المنتخب اللبناني ضد المنتخب الكوري  ضمن التصفيات المؤهلة لكأس العالم في تمام الساعة 2.30 ظهراً بتوقيت بيروت.